結婚籌備十 - 新娘化妝

決定轉 mua，老公叫我搵番影 pre-wedding 時幫我化妝嘅 Sylvia。

其實，係啱啱影完 pre-wedding 嘅時候，我都已經想轉佢，因為細心、易溝通、各方面感覺都非常好！！！

但本身化妝一早 book 左、畀左一半訂，果時老公話化妝個個都差唔多 ga la，畀左訂就無謂轉。

但點都估唔到，依家都係要轉，仲要係結婚前2個幾禮拜。

唉...當初，我同老公諗法一樣，化妝嘅野，邊個化都唔會差好遠。但依家終於明白，點解人地話化妝係要人夾人。

就係咁，係咁鬼'文'嘅時間，有D擔心咁問 Sylvia 仲有無期。好好彩，佢果日仲 ok，前後一日都唔得，哈哈哈。

Book 左 Sylvia 之後，簡直成個人鬆晒

係 pre-wedding 嘅時候，佢幫我化左3日妝，所以對佢係有十萬個放心。而且對佢化妝set頭技巧，亦好滿意，同埋最重要係過程舒服。

再叫埋佢幫手搵人化埋姊妹、媽咪奶奶，佢 say ok，咁我又好放心等佢去安排。

我無聽過佢講任何免責聲明。有需要做，我唔駛出聲，佢都會自動去做、用佢自己方法去搞掂。心水清嘅佢知道我嘅性格，有D野係唔需要預早講定。呢D先係 service lor。

Send 左 rundown、婚紗晚裝相、我仲意嘅髮型相畀佢，佢再提下我點攪個頭髮，confirm 下晚裝個顏色、當日行程時間，就 ok la。

我同老公都認為就算無左之前畀左嘅訂，搵 Sylvia 嘅決定係絕對正確，因為我地可以係結婚果日，少擔心左樣野！

閱讀更多 »

結婚籌備九 - 新娘化妝

8月中，我打左電話畀之前 book 左個 mua，因為佢叫我係結婚一個月之前，主動打畀佢傾 rundown 嘅野。

打電話去，飛左去留言，咁就 send email 畀佢。佢之後 email reply 番，叫我 send 個 prelim rundown、婚紗晩裝D相畀佢。

首先，佢 arrange 助手同我傾左一轉電話先，講下當日rundown、所需時間、要準備乜野，個電話講左成個鐘

過左幾日，同 mua 講電話，主要係傾當日嘅妝、髮型，又再畀參考意見 on 當日行程、要準備乜野。又講左成粒鐘

究竟講左D咩，要前後成2粒幾鐘，細節嘅野我已經唔係好記得，因為當時我係左耳入右耳出。開頭果15分鐘，我都有用紙筆寫低佢地講嘅參考意見，但之後，已經放棄

其實，我明白佢好想令到我結婚果日，可以好完美、好 smooth 咁完成，盡量唔好出意外，就算有意外，都可以從事前已準備嘅野而解決左。

但對於佢D參考意見、要另外準備D野，我覺得對於我自己、對於我個婚禮係無需要 law。

當我同佢講無咁嘅需要果一刻，佢就話＂咁你都想你果日係最靚、同果日可以順利完成 ga ma＂

基本上，佢講完呢句野，我已經收聲，唔想再講野。咁係咪唔聽佢講、無預備D野，我果日就會唔靚、結唔成婚先！

我可以完全 ignore 佢講嘅野，只係參考意見 jei。咁我見D野無咁嘅需要，自知都唔會去準備佢要嘅野，咪早D同佢講定先，但佢咁答我，即係要我一定要準備 la。

其實，要準備嘅野，有D要額外買：唔知乜鬼膠紙、多1個 nubra............唔係好貴，但真係無需要 ar ma。

又要有邊個姊妹睇住D乜、邊個看住花球.......................我話得2個姊妹，因為只請親戚，早上又無諗住玩接新娘遊戲，所以無嗌咁多姊妹幫手。但佢話＂咁你都要搵個人睇住D乜乜乜＂

我果刻嘅感覺係，佢好 na 煩。

我唔覺得佢果套咁公式化嘅處理手法（我最怕呢樣野）適合我同我嘅婚禮。我係度諗，到結婚果日，佢呢D無形壓力，係會令到我好緊張 law。

仲有，對於媽咪奶奶嘅髮型，佢講嘅免責聲明，我同老公都覺得唔係好掂。

我問老公好無轉 mua，佢話唔轉嘅話，煩都係煩我 ja ma... 最後，我地決定轉 mua。

閱讀更多 »

結婚籌備八 - 場地布置

8月頭，去左半島 confirm 結婚果日嘅細節：流程、時間、圍數、食物飲料、所需設備、布置、花車之類，傾左約1粒鐘，就走la。

開始嘅時候，無諗住搵人攪場地布置，一黎我上網睇過D wedding decoration 嘅公司，覺得來來去去都係果幾款，唔係唔靚，不過，我搵唔到個啱心水；二黎果D公司個 package fix 左，好似我唔需要佢果D龐大嘅 backdrop，但個 package 一定包埋；三黎半島個擺酒地方本身已好靚，無需太多 decoration，而且佢話會有鮮花布置。

但同半島傾完之後，先發現佢 provide 嘅布置太簡單 la。張 reception 同 photo table 只有一盆
花，backdrop 只有一個 oval name board，好似單調左D wo。

所以，第二日，攞帖嘅時候，就再搵 Joyce 幫手整場地布置。我本身無 idea 應該點布置，都係佢畀意見，因應我嘅 budget、要整D咩，再睇下我 ok 唔 ok。

最後，我 confirm 左係 reception 同 photo table 加左佢手織嘅玫瑰（好靚）、stage 兩邊加左幾個 stand 用黎插鮮花，其他嘅配襯、要咩顏色，就由佢決定。咁又搞掂！

閱讀更多 »

結婚籌備七 - 婚紗相、律師、花球

7月尾，有得睇 pre-wedding photos la。阿攝影師真係影左好多好多張相，我地用左3、4日就揀左3本相簿、油畫、簽名布嘅相，再話畀佢地知要執相嘅地方

另外，我地去左壹誓個 workshop。Oath 之前 send email 叫我地 online book workshop，個 workshop 係一大班人一齊上，大多數都係一對對。

負責講 workshop 果個本身就係律師，佢會話畀你聽：Oath 會幫你搞掂晒嘅法律文件、註冊時嘅流程、新人要注意嘅地方，連點樣 march in、戴戒指、新人企位點樣方便影相都講埋，大約一個多小時（無記錯嘅話）。

上去果日，會簽埋'擬結婚通知書'，畀埋 id copy 同尾數，咁就走 la。之後，都係 email follow-up 番D野，同埋係結婚之前果日，打電話畀沈律師 remind 佢時間地點，咁就搞掂！

8月頭，去左花墟揀花球。我對花球呢樣野，要求唔高。所以，我無特別揀D名牌花球，因為花就係花，話之佢由日本空運過黎、定大陸黎，D花唔會有標韱話佢自己係邊樹黎，正常大部份人肉眼都唔會分得出 la。

既然係咁，無謂畀幾千蚊去純粹買條名牌絲帶。而且，我覺得無乜人會留意我果日拎咩花球lor 

所以，就去番之前幫襯過、整 pre-wedding 絲花花球果間玲玲花店。

係影 pre-wedding 嘅時候，諗住平平地係花墟揀間花店，行左30分鐘，比較左大部份舖頭嘅價錢、現成/即叫即整（現成果D黑蚊蚊），就揀左呢間。一黎價錢平、二黎即叫即整、三係負責人有心做生意。

我對花種、花名唔係好識，有D鋪頭問多句，已經串串貢。遇到呢D舖頭，我會即走，因為全香港花店多的是！

呢間花店嘅 wedding package 都唔係好貴，我個主花球要鬱金香，但未諗要咩顏色，就睇佢個相簿，負責人畀左D意見，就揀左紫色。

配襯嘅有白色加紫色嘅花（sorry，唔係好記得果D係咩花）、再加D葉仔。佢有畀埋絲帶，但結婚果日，我覺得有D累聚，就抆走左條絲帶。

至於頭花，佢本身包埋主花球所揀嘅花，會畀3-4朵。 但我畀佢睇埋之前係雜誌影底嘅新娘髮型，話畀佢聽我想要呢D呢D頭花，佢都話ok，唔駛加$，真係好！

閱讀更多 »

結婚籌備六 - 媽咪衫、造西裝

同一時間，上網 search 下媽咪衫，發覺D款來來去去都係果D，咁就搵左2間 comments 比較好，打電話去 book 時間試衫。

幾日後，同 mum 去試衫。首先，去左第一間係百利。

呢間鋪頭細，又多人，都唔緊要。幫 mum 試衫果個人，不停咁催佢揀衫出黎試，咁 mum 又心大心細，揸唔定主意，但果個人又淨係係度催。

最後，揀左3件衫出黎，呢個數量係規定ge。試果時，mum 話邊度闊邊度長，問有無得改，佢話啱 ga la，唔駛改 ga la 佢當我儍 ga，既然係咁，試完果3件，就即走。

跟住，試第二間。一上到去紫水晶，已有2枱客係度，但地方依然好闊落。呢度可以坐低慢慢睇相簿揀，mum 就揀左幾件黎試。

呢度闊窄長短都有得改，D阿姐都會畀下意見咁，呢D先叫 service lor。Mum 試左好多件，愈試愈開心，所以話女人都係貪靚。Mum 成日問我邊件好睇，其實我覺得D款件件都差唔多，佢覺得靚就 ok。最後揀左2件晚裝。

終於搞掂呢個咁艱辛嘅任務。

隔左一個禮拜，再陪奶奶，又去紫水晶試衫。

開始時，奶奶睇完相簿只揀左1件衫。老公陪佢一齊再睇相簿，再揀多2件出黎，個阿姐都問揀咁少？

試完3件後，個阿姐建議佢試邊件邊件，我地話好，佢都無意見。又係果句，女人都係貪靚嘅，佢亦愈試愈開心，最後，揀左2件晚裝。

又完成一個艱辛嘅任務la

又隔左一個禮拜，我地帶左 dad & 老爺去造西裝。間野係尖沙咀，老公個 friend 介紹 ge。呢個任務簡單D，因為只係睇衫版去揀顏色、花紋、質料，揀岩就度身，咁就搞掂。根據佢地所講，個師父度身度得好岩，同埋手工幾好。

閱讀更多 »

結婚籌備五 - 過大禮，印請帖

Book 晒婚紗晚裝、化妝、攝影之後，就無再搞結婚D野住，因為要 plan 瑞士旅行嘅行程。就係咁，再 take up 番結婚D野嘅時候，已經去完瑞士番黎，即係7月中。

根據阿紫微斗數師父所擇嘅吉日，過大禮係7月23。一個禮拜前，mum 問我整左帖咪，佢話過大禮時派餅，順便派埋帖畀親戚。

我初時諗住結婚前一個月先派，即係8月頭。既然係咁，就打電話問半島攞個請帖 sample，呢個半島包埋。

但佢嘅帖只係得 English version，唔係好岩我地D親戚，如果畀 friend 就ok。而且要我地自己手寫或print，咁填番日期、時間、地點、新人名字果D空格，我覺得好煩 lor。

所以，我放棄用半島嘅帖，自己出去印。最方便就梗係上網 search，但好多都係好 classic 果D款，即係紅當當、囍字、Q版公仔樣。我覺得我另外畀$搵人印，絕對唔想要呢D。幸好，只 search 左約一粒鐘，就搵到個岩心水。

呢間所有 wedding 野都係 DIY，張帖都係，全人手整 ge。其實張帖好簡約，我就係仲意呢樣野。Email 問左負責人Joyce 一D印帖嘅問題，再約左幾日後出來傾。

同 Joyce 傾左約一粒鐘，就搞掂左個 design。不過，幾日後就係過大禮，我都知道時間超'文'，所以我預左幾日後過大禮係派唔到帖。其實，遲D派帖，我覺得完全無問題

要決定印幾多張帖嘅時候，我地就各自問番雙方父母嘅實際人數。Dad & mum 畀左一張 name list 我，我睇完之後，眼都突埋。5圍枱，佢真係放足60個人名，仲要另加每圍多1-2個所謂小孩，即係每圍13、14個。

My god!!! 酒店擺酒唔係話加人就加人，除左要另外畀$之外（per person 計！），每圍頂多畀你加一個（嘔血-ing...）。經過我強烈反映，個 name list 最後係每圍12個。但對我黎講，依然嘔血。

唉！講番過大禮，最重要就係簡單。除左係奇華預訂左過大禮用嘅餅盒、嫁女餅，其他野全部'包羅萬有'搞掂晒。

呢樣野當然事前同 mum 講好左先，因 mum 最開頭話過大禮要海味、冬菇.......等等，但我話實在太煩 la，記唔到咁多野，而且佢都係識D唔識D，咁我話一封'包羅萬有'利是畀佢，就包晒過大禮嘅野。好彩在旁嘅表姐都和應咁做。

到過大禮果日，老公一早同表姐出去攞餅。D親戚又係一早已經上左黎我屋企，之後 mum 叫我落街買D西餅畀親戚食。

老公就係呢個時候，攞完餅去到我屋企，放低嫁女餅、包羅萬有利是、禮金。mum 打電話畀我叫我係街度行一陣先，等老公走左先返屋企。

跟住，老公同表姐去左男家，放低龍鳳餅、生果、一袋袋有意頭嘅野（sorry，真係唔記得果袋野入面係D乜，因為係表姐預備 ge)。

老公走左之後，mum 先打黎叫我番屋企。唉，真唔明，男女雙方係過大禮嘅時候，點解唔可以見面。

到左晚上，mum 又話要擺2圍請女家親戚食飯。都係果句，唔明！

閱讀更多 »