結婚大日子 3

結婚第2日，10點到起身，call 早餐。半個鐘後，送到黎酒店房。係度歎緊早餐嘅時候，我地先至可以好好咁欣賞間咁靚嘅房。

由於我地一早 request 延遲退房，所以，間房嘅 fax 機一早 fax 左張野黎，話可以2點先退房。

不過，食完早餐、執拾埋D行裝，我地12點半就 check out la。但將拎番屋企嘅野，放係酒店到先，因為我地要去還衫。

之後，就去 TST、Central、WC、CWB 到還衫。

搞掂晒D野，就番去酒店攞番D行李，即刻番屋企。果時已下午5點，我覺得成個人好似虛脫咁。

就咁完成左我地個結婚 la，我亦寫完關於結婚嘅 blog。

係寫到一半嘅時候，有D想放棄。好明顯係我個人對結婚要搞咁多野，真係覺得好煩。

好肯定ge係，雙方父母係果晚，真係好開心。而無可否認，我果日都好開心，始終一世人一次。

但當我問番老公，我同佢都一樣，可以嘅話，唔駛擺酒就最好。睇下我寫關於結婚嘅 blog，寫左十幾篇，為嘅只係 big day 果一日！！

不過，都要多謝親戚黎飲，多謝父母體諒，多謝兄弟姊妹無私嘅幫忙。

多謝 Gary team 幫手影相（個CD/DVD package 好靚)，多謝 Sylvia 幫手化妝（非常非常滿意果日嘅造型！！），多謝 Joyce 幫手整帖同 decoration（DIY 玫瑰好靚），多謝半島工作人員（好 pro 嘅 service，好多細節都自動幫我地搞掂）。祝各位生意愈黎愈好！

依家，我已經係 c9 一名 

閱讀更多 »

結婚大日子 2

影相影到5點，就換晚裝等親戚黎。不過，果日係平日，邊有人咁早黎。所以，係7點前，只係間中有幾個親戚早到黎影相，同切埋蛋糕後，時間都過得幾無聊。

7點開始，D親戚開始一窩蜂咁黎。

本來，諗住7點半換衫、8點註冊。當我想係7點40分去換衫嘅時候，酒店個 captain 話最好等多D人黎先開始註冊。佢仲叫律師遲半個鐘再上黎，好明顯，酒店同阿律師好熟。

大約8點，雖然仲有人未到，但我同老公都唔想攪到個晚宴好晏先開始，所以就決定入新娘房換衫。

正當我想入去嘅時候，突然有事阻礙左我同老公...2分鐘。至於係咩事，我就唔係好想講。

但果一、兩句說話，已令到我積壓左好耐嘅唔耐煩，唔爆都唔得，不過，亦係維持左2分鐘度。

正當化緊妝嘅時候，律師走入黎 confirm 下D資料同 remind 下註冊流程。當佢講到話新郎會揭起新娘頭紗嘅時候，我即刻話唔會揭頭紗，因為我無諗住 march in 嘅時候，用頭紗冚住自己，費時揭黎揭去咁煩。

8點半開始註冊， march in、讀誓詞、交換戒指、簽名、同父母合照、切蛋糕、champagne toasting 完，就落去主家席開始上菜。

食到第二道菜，我又換最後一件晚裝。換完，就等上翅，然後敬酒。

敬完酒，就再逐圍去影相。好彩得10圍，好多野好快就搞掂。

10點半，已經到糖水。我已經想企出去等送客。不過，阿 captain 又話可以遲少少先，如果唔係，好似好趕住走咁。（事實上，係！阿 captain 真係幾明白我 ga wo，哈）

過多5分鐘到，上埋 petit four，我地就企出去等送客。呢個時候，見到 joyce 番黎清場，辛苦晒！

11點半到，已清晒場，所有人都走晒。找埋晩宴筆數，由酒店工作人員幫我地拎野上房，我同老公就拿拿臨番酒店房。

快快沖涼落妝，然後休息 lu。

閱讀更多 »

結婚大日子 1

終於到左結婚果日。7點鐘起身，梳洗執野，食左2個麵包做早餐，等化妝師黎。

Dad & mum 一早已唔係屋企，佢地約左親戚飲早茶！

大約8點，姊妹已到左。哈，我約佢8點半上黎，竟然早半粒鐘到，thank you！

8點半，化妝師到左。我就開始係房度化妝，之後，我就無再理其他野。

其間，個姊妹未到佢化妝，就走入黎傾偈；親戚黎左，就走入黎打招呼。最開心係，收到D friend SMS、whatsapp 黎恭喜我，真係多謝晒！！

9點9到，攝影師黎埋，又係早到左。佢地有4個人，見佢地行出行入，攞晒我D掛、婚紗、鞋去影相。

10點鐘，收到老公電話，話佢同花車已到左我樓下。咁就叫攝影師落樓影佢地。

之後，表姐拎住 mum 整嘅炒餸，叫我係咁意食少少。呢D應該係意頭野，但我唔知係乜。除左冬菇之外，我已經唔記得我食左D乜，因為我唔係好想食，人地係度化緊妝，食乜 gwe ar！

10點半化完妝，著埋套褂，攝影師又番左上黎，就同我影左D snapshot。

11點老公上黎接新娘，我果時同 dad 係房度（um...其實，我唔係好明，點解一定要 dad 係度，再一定要佢帶我去見新郞？）

姊妹收左封開門利是，係咁意為難下新郞，就好順利接左新娘 la。之後，就係斟茶。

12點出門去男家，係男家好快咁斟完茶。之後，回門返女家，攞晒D野上車，再出發去酒店。

出到酒店已2點，老公同兄弟去買外賣，我同姊妹就休息。

大約2點半，化妝師上到黎酒店，開始換妝換髮型。醫下肚、化下妝、換埋婚紗，攝影師剛剛上到黎，又開始影相。

係酒店房影左一陣，就落 M2 floor 今晚晚宴地方影。

落到 M2，見 Joyce 已整好 decoration。最攪笑嘅係，化妝師原來同 joyce 係識得 ge。

閱讀更多 »

結婚籌備十四 - 兄弟姊妹、結婚之前一曰

我地早上有接新娘出門儀式，但無諗住玩接新娘遊戲。唔係我錫住老公，而係我怕煩，唔想又要約時間搵姊妹出黎傾遊戲，同埋唔想為左玩D無聊遊戲，而特登要D姊妹去左買右買野。

我就係咁，D friend 結婚叫我做姊妹，我就周圍去幫佢地買野都無所蝟，但到我自己結婚，就唔係好想攪咁多野 la !

所以，簡單D，淨係搵左2個姊妹同2個兄弟。

結婚要嘅野，我同老公都準備安排好晒。rundown 我都執好晒、分配埋各人工作，結婚之前幾日先 email 畀兄弟姊妹。

除左約姊妹去揀姊妹裙之外，我地對兄弟西裝無特別要求。事前大家傾都唔駛傾，因為流程、物品都盡量簡化。

結婚之前一日，超多野攪。

首先，中午去 CWB 修甲。之後，化妝師打黎 confirm 時間地點。哈，我仲諗住晏D打畀佢 remind 佢。

修完甲，同老公去食D野先，之後係 CWB 攞晚裝；然後落 WC 攞褂；再去 Central 攞婚紗，係呢度要試著多一次，同埋即刻修改左少少野。

當我試緊衫嘅時候，叫老公打電話畀攝影師、van 仔司機、同埋律師，remind 佢地聽日時間地點。

試完衫，就繼續去 TST 攞男禮、媽咪奶奶晚裝；最後，去 MK 攞花球㩒花之類。

搞掂晒，就番屋企 la，果時已經係夜晚7點，好赲。

番到屋企，都無乜特別野攪，係等到11點令，就上頭。

我叫 mum 求其係咁意就得，我諗3、4分鐘就搞掂。mum 叫我食湯圓，我話唔食la，要瞓覺。我叫佢整熄D香燭，因為係度煙薰緊間屋，佢話要等D香燒晒先得。何必咁認真呢！

沖埋涼，就瞓覺 lu。

閱讀更多 »